Gall plant eich plagio drwy ofyn dro ar ôl tro am bethau neu eich anwybyddu pan fyddwch chi'n dweud na. Mae'n arferol i blant wneud hyn a chael stranc os nad ydyn nhw'n cael yr hyn maen nhw ei eisiau - ond gall fod yn anodd peidio ag ildio i'r plagio.
Beth sydd yn y canllaw hwn
Gall bod yn barod leihau plagio
Byddwch yn barod
Wrth i blant dyfu i fyny, byddant yn gwella wrth dderbyn siom a rhwystredigaeth. Mae'n sgil anodd i’w ddysgu, ac mae'n cymryd amser, ond mae yna lawer y gallwch chi ei wneud i'w helpu.
Un peth y gallwch roi cynnig arno yw cael sgwrs, cyn i chi fynd allan i siopa, am yr hyn y byddwch ac na fyddwch yn ei brynu. Mae hyn yn golygu y gallwch ddweud na wrth bethau nad ydych am eu prynu mewn sefyllfa fwy hamddenol, gyda'r amser sydd ei angen arnoch i egluro pam nad ydych yn prynu rhywbeth. Hefyd, os ydynt yn cynhyrfu gallwch ddelio â hyn adref, lle bydd gennych fwy o breifatrwydd.
Mantais arall o wneud hyn yw ei fod yn rhoi cyfle i'ch plentyn baratoi ei hun ymlaen llaw at deimlo'n siomedig. Dylai hyn olygu na fyddant yn cael eu llethu gymaint gan emosiynau cryf pan fyddwch yn dweud na wrth rywbeth maent ei eisiau yn y siopau.
Beth i ddweud wrth eich plentyn
Rydym i gyd yn ildio i blagio nawr ac yn y man, ac nid yw hyn yn gwneud unrhyw niwed. Ond mae'n debyg eich bod hefyd wedi sylwi po fwyaf y byddwch chi'n ildio, y mwyaf y byddwch chi'n cael eich plagio. Y ffordd i leihau plagio yw cael ychydig o strategaethau y gallwch eu defnyddio pan fydd eu hangen arnoch.
Os oes rhywbeth y maent yn ysu am ei gael a'ch bod chi eisoes wedi egluro pam nad ydych yn ei brynu, gallwch chi geisio:
- Awgrymu y gallent wneud tasgau am arian i'w helpu i gynilo yn gyflymach.
- Ei ychwanegu at restr pen-blwydd (gallwch fynd trwy'r rhestr gyda nhw yn agosach at yr amser os yw'n mynd yn rhy hir).
- Cynnig gwobr iddynt os gallant roi'r gorau i'r peth y maent yn gofyn ichi amdano. Gall y wobr fod yn rhywbeth syml nad yw'n mynd i gostio mwy. Er enghraifft, fe allech chi adael iddyn nhw ddewis pa ddantaith rydych chi'n mynd i'w brynu.
- Egluro y gallant ddefnyddio eu harian poced i gynilo ar ei gyfer - fe allech hyd yn oed ei ysgrifennu i lawr ar restr i wneud iddo deimlo'n fwy real.
Gêm sticeri
Mae dysgu’r gwahaniaeth rhwng ‘ y pethau rydych eu heisiau’ a’r ‘ pethau rydych eu hangen’ i'ch plentyn yn eu helpu i ddeall pam nad ydych chi'n prynu popeth maent yn gofyn amdano. Mae'r gêm syml hon yn dangos i'ch plant pa rai o'r pethau rydych yn eu prynu sy'n ‘y pethau rydych eu heisiau’ a’r ‘ pethau rydych eu hangen’:
- Rhowch ddau liw sticer i’ch plant - un am ‘pethau rydych eu heisiau’ ac un am y ‘pethau rydych eu hangen’.
- Gofynnwch iddynt fynd o gwmpas y cartref yn rhoi sticeri ar bethau sy’n ‘pethau rydych eu heisiau’ a’r ‘pethau rydych eu hangen’.
- Pan maent wedi gorffen, gofynnwch iddynt ddweud wrthych am y penderfyniadau maent wedi eu gwneud. Mae hwn yn gyfle da i siarad am ba bethau rydych chi’n meddwl sy’n eitemau hanfodol a pha bethau sy’n ddanteithion.