Mae angen i'r rhan fwyaf ohonom fenthyca arian ar ryw adeg yn ein bywydau. Gall defnyddio'r math cywir o gredyd yn y ffordd orau eich helpu i ddelio â chostau annisgwyl, fel prynu oergell neu beiriant golchi newydd. Darganfyddwch beth i'w ystyried yn gyntaf, i wneud yn siŵr eich bod yn gwneud y penderfyniad cywir.
Beth sydd yn y canllaw hwn
Penderfynu a ddylid benthyca arian
Mae rhai cwestiynau pwysig y mae angen i chi eu gofyn i'ch hun cyn i chi fenthyca arian. Er enghraifft, a allwch chi aros nes bod gennych chi ddigon o arian i osgoi benthyca? Ac allech chi fforddio ei dalu'n ôl pe byddech chi'n benthyca'r arian?
Os ydych yn cael trafferthion ariannol, yn gyntaf gwnewch yn siŵr eich bod yn hawlio'r holl fudd-daliadau y mae gennych hawl iddynt ac a oes grantiau neu ad-daliadau y gallech fod yn gymwys i'w cael.
Hefyd, edrychwch a oes ffyrdd eraill i ostwng eich costau, er enghraifft trwy newid darparwr ynni, ffôn neu rhyngrwyd.
Os ydych yn tueddu i fod yn fyrbwyll wrth brynu pethau, ceisiwch roi cyfnod callio i chi'ch hun o leiaf ddau ddiwrnod. Pan fyddwch wedi cael cyfle i feddwl am y peth, efallai y byddwch yn newid eich meddwl.
Os ydych yn wynebu costau byw uwch, darganfyddwch am ffynonellau ychwanegol o incwm a chymorth yn ein hadran Help gyda chostau byw
Os ydych chi'n ystyried benthyg arian i helpu i dalu'ch biliau, dylech ystyried cael cyngor ar ddyledion am ddim yn gyntaf. Darganfyddwch fwy am ddelio â dyled.
Os ydych yn penderfynu i fenthyca arian
Os ydych yn bendant eisiau, neu angen benthyca arian, dyma rai pethau i'w hystyried.
Faint allwch chi fforddio ei ad-dalu?
Mae'n bwysig cyfrifo faint y gallwch fforddio ei ad-dalu bob mis, gan y bydd hyn yn effeithio ar ba opsiwn benthyca sydd orau i chi.
Gwnewch yn siŵr eich bod yn realistig ynghylch faint y gallech ei dalu pe bai'ch morgais, er enghraifft, neu rent yn codi, yn gorfod gwario mwy ar bethau fel biliau ynni, neu os cafodd eich cyflog ei ostwng.
Dewis y math cywir o gredyd
Gallai’r math cywir o gredyd neu fenthyciad ar gyfer eich sefyllfa olygu eich bod yn talu llawer llai yn gyffredinol. I helpu, bydd ein teclyn Eich opsiynau ar gyfer benthyca arian yn dangos amrywiaeth o opsiynau credyd a allai weddu i'ch anghenion.
Pan fyddwch wedi cyfrifo pa fath o gredyd sy'n addas i chi, edrychwch o gwmpas a chymharwch gytundebau. Mae'n bwysig edrych ar:
- gyfradd llog a'r gyfradd ganrannol flynyddol (APR)
- faint fyddwch chi'n ei ad-dalu yn gyfan gwbl
- unrhyw gosbau am daliadau hwyr neu a fethwyd, neu ffioedd os byddwch yn eu talu'n ôl yn gynnar
- cost yr wythnos neu'r mis, ac a allai hyn amrywio.
Dysgwch fwy am gostau benthyca, gan gynnwys gweithio allan gynllun ad-dalu a phenderfynu faint i'w fenthyca, yn ein hadran Rheoli Credyd yn dda
Byddwch yn wyliadwrus o gredyd cost uchel
Os oes gennych sgôr credyd gwael, efallai y cewch eich temtio i ddefnyddio cwmni benthyciad diwrnod cyflog. Cyn cofrestru ar gyfer benthyciad diwrnod cyflog neu unrhyw fath arall o fenthyca cost uchel, gwnewch yn siŵr eich bod wedi archwilio'r holl ddewisiadau eraill posibl.
Cadwch lygad am fenthyciwr arian didrwydded
Mae benthycwyr yn aml yn defnyddio sianeli ar-lein fel cyfryngau cymdeithasol i geisio benthyg i bobl. Mae'r math hwn o fenthyca yn anghyfreithlon a gallai gostio llawer mwy i chi nag yr ydych chi'n meddwl.
Dysgwch fwy am fenthycwyr arian didrwydded a sut i'w hadnabod
Isafswm taliadau
Yr isafswm taliad yw'r swm isaf y mae'n rhaid i chi ei dalu bob mis er mwyn osgoi cosb.
Mae swm yr isafswm taliad fel arfer yn seiliedig ar ganran o'r hyn sy'n ddyledus gennych, felly mae'n gostwng bob mis wrth i'ch balans leihau.
Mae hyn yn golygu y bydd yn cymryd mwy o amser i chi dalu'r hyn sy'n ddyledus gennych os mai dim ond isafswm taliadau y byddwch yn eu talu, a bydd yn costio mwy i chi.
