Pam nad gamblo yw’r ateb i’r argyfwng costau byw
Cyhoeddwyd ar:
11 Tachwedd 2022
Gyda chyllidebau cartrefi yn gorfod ymestyn ymhellach bob wythnos, gall fod yn demtasiwn i gredu y gallai gamblo ddarparu’r arian sydd ei angen arnoch i dalu eich biliau a chostau eraill. Dyma pam na fydd gamblo yn helpu - a ble i ddod o hyd i gymorth os oes gennych broblemau ariannol.
Mae costau byw yn cynyddu - ac nid gamblo yw’r ateb
Mewn teuluoedd ar incwm is, mae menywod yn aml yn rheoli cyllideb y cartref[i]. Ac i lawer ohonom, mae’n mynd yn anoddach bob wythnos i ddod o hyd i'r arian am fwyd, biliau, costau tai a mwy. Pan fydd arian yn dynn, gall fod yn hawdd chwilio am ffynonellau incwm eraill i helpu.
Felly efallai nad yw’n syndod bod mwy o fenywod yn gamblo ar-lein y dyddiau hyn[ii], yn enwedig gyda chymaint o opsiynau gamblo ar gael 24/7 trwy ein ffonau. Ond mae gamblo yn dod â risgiau. Yn wir, mae un o bob pum menyw sy’n gamblo eisoes yn profi problemau fel straen a phryder oherwydd gamblo[iii].
Bwriad cwmnïau gamblo yw gwneud arian, nid ei roi i ffwrdd
Os ydych yn gamblo, dros amser byddwch yn rhoi mwy o arian i’r cwmni gamblo nag y maent yn ei roi i chi (roedd cwmnïau gamblo wedi gwneud dros £12.7 biliwn ym Mhrydain Fawr y llynedd[iv]). Mae ceisio ennill arian yn ôl rydych wedi'i golli yn gyffredinol yn arwain at golledion mwy. Felly os ydych eisoes yn teimlo'r straen, bydd gamblo bron yn sicr yn gwneud pethau'n waeth.
Ond os ydych yn pendroni o ble mae’r arian i dalu eich biliau yn mynd i ddod y mis hwn, mae HelpwrArian yma gydag ystod o gyngor arbenigol a theclynnau arbenigol.
Cyngor ariannol i’ch helpu i deimlo mewn rheolaeth eto
Beth bynnag fo’ch sefyllfa, gall HelpwrArian eich helpu i ddod o hyd i’r cymorth cywir, rheoli eich cyllid a dod o hyd i ffordd ymlaen.
Gall siarad helpu
Mae cynnydd yn nifer y menywod sy’n profi problemau neu niwed a achosir gan gamblo. Fodd bynnag, mae llawer o bobl sy’n gamblo yn ei chael hi’n anodd siarad amdano.
Mae’n gallu bod yn arbennig o anodd i ferched, gan fod gamblo yn dal i gael ei ystyried yn fwy derbyniol i ddynion o hyd. Ond os ydych yn poeni am eich gamblo eich hun, neu rywun rydych yn ei garu, cael sgwrs yn aml yw’r cam cyntaf tuag at gael help.
Os ydych yn poeni y gallai eich gamblo fod yn achosi problemau i chi, peidiwch â chadw’ch pryderon i chi’ch hun - siaradwch â ffrind y gallwch ymddiried ynddo neu aelod o’r teulu.
