Rheoli cyllideb eich cartref ar ôl i chi wahanu

Ar ôl i chi wahanu, mae gwneud cyllideb yn lle da i ddechrau adolygu'ch gwariant.

Yn syml, mae cyllideb yn gofnod o faint o arian sydd gennych yn dod i mewn a beth sy'n mynd allan bob mis.

Pan fyddwch wedi cwblhau'ch cyllideb, dylai fod gennych syniad mwy clir o'r hyn sydd gennych i fyw arno.

Gwelwch a allwch dorri'n ôl ar eich gwariant o ddydd i ddydd. Bydd hyd yn oed ychydig bunnoedd a arbedir yma ac acw yn adio i fyny.

Os nad ydych erioed wedi newid eich cyflenwr nwy neu drydan, neu os nad ydych wedi newid am ychydig, mae'n werth edrych eto gan y gallai arbed arian i chi.

Gallwch hefyd ystyried newid os ydych, er enghraifft, eisiau tariff pris sefydlog. Trwy hynny, byddwch yn gwybod y pris rydych yn ei dalu am eich nwy a'ch trydan bob mis neu chwarter.

Os oes gennych fand eang gartref, a bod gennych linell dir neu ffôn symudol, efallai y gallwch newid neu gael cynnig gwell gan eich darparwr presennol.

Gall costau teithio wneud tolc mawr yn eich cyllideb - er enghraifft, eich tocyn trên i'r gwaith neu gost rhedeg eich car.

Os yw'ch partner yn symud allan a chi yw'r unig oedolyn sy'n byw yn yr eiddo, gallwch hawlio gostyngiad o 25% ar eich bil Treth Gyngor.

Gallwch hefyd hawlio'r gostyngiad os yw oedolyn yn byw gyda chi sy'n fyfyriwr llawn amser, yn ofalwr sy’n byw i mewn neu rywun ag anabledd meddwl difrifol.

Os ydych ar incwm isel, efallai y byddwch hefyd yn gallu cael gostyngiad yn eich Treth Cyngor. Bydd rhaid i chi wneud cais i'ch cyngor lleol.

Yn dibynnu ar eich incwm a’ch sefyllfa, efallai y gallwch hawlio ‘rates Housing Benefit’ neu ‘Rate Relief’.

Er y gallai arian fod yn dynn ar ôl gwahanu, mae'n werth ceisio rhoi rhywfaint o arian i ffwrdd bob wythnos neu fis fel cynilion argyfwng, os gallwch. Yn y ffordd honno, os yw'ch boeler neu beiriant golchi yn torri i lawr, er enghraifft, bydd rhywfaint o arian wrth gefn gennych.