Gallai’r arian rydych yn ei gymryd allan neu adael yn eich cronfa bensiwn effeithio ar faint y gallech fod angen ei dalu tuag at gostau gofal yn nes ymlaen mewn bywyd. Gall gofal gynnwys cymorth yn y cartref gyda phethau fel ymolchi, gwisgo, mynd allan, aros mewn cysylltiad â ffrindiau a theulu neu symud i gartref gofal. Gelwir hyn yn ofal cymdeithasol a chynghorau lleol sy’n gyfrifol amdano.
Beth sydd yn y canllaw hwn
Sut mae gofal yn cael ei dalu amdano
Nid yw gofal cymdeithasol am ddim. Efallai bydd rhaid i chi dalu rhywfaint neu’r holl gost eich gofal.
Bydd eich cyngor lleol yn cyfrifo faint y gallwch fforddio ei gyfrannu tuag at eich costau gofal. Byddant yn edrych ar:
- unrhyw arian sydd yn, neu, sydd wedi’i gymryd o’ch cronfa bensiwn - naill ai fel arian neu incwm
- unrhyw incwm arall sydd gennych
- eich asedau (er enghraifft cynilion a buddsoddiadau).
Darganfyddwch fwy am ofal hirdymor yn ein canllaw Sut i ariannu’ch gofal hirdymor – canllaw i ddechreuwyr
Sut y caiff eich cronfa bensiwn ei hasesu
Ymddeol yn hwyrach neu oedi cymryd eich cronfa bensiwn
Os byddwch yn gadael arian mewn cronfa bensiwn, ni fydd eich cyngor lleol yn cyfrif hwn pan fyddant yn cyfrifo faint y gallwch fforddio ei dalu am ofal.
Er hynny, unwaith eich bod wedi cyrraedd eich oedran Pensiwn y Wladwriaeth, bydd eich cyngor lleol yn cymryd yn ganiataol eich bod yn cael incwm o’ch pensiwn.
Eich oedran Pensiwn y Wladwriaeth yw'r cynharaf y gallwch ddechrau derbyn eich Pensiwn y Wladwriaeth. I weithio allan eich oedran Pensiwn y Wladwriaeth, ewch i GOV.UKYn agor mewn ffenestr newydd
Os nad ydych yn cymryd incwm, byddant yn edrych i weld faint y byddech yn ei gael os byddech yn prynu incwm gwarantedig gydol oes (blwydd-dal). Byddent yn defnyddio’r swm hwn pan fyddant yn cyfrifo eich incwm.
Cael Incwm ymddeol hyblyg
Ydych chi'n defnyddio'ch pensiwn yn hyblyg trwy ei fuddsoddi a chymryd incwm ohono? Yna bydd eich cyngor lleol yn edrych ar faint y byddwch yn ei gael pe byddech yn prynu incwm gwarantedig gydol oes (blwydd-dal).
Yn dibynnu ar faint rydych yn ei dynnu o'ch cronfa, efallai y byddant yn ei ystyried yn gyfalaf neu'n incwm wrth asesu faint sydd angen arnoch i dalu costau gofal.
Cymryd eich pensiwn fel nifer o gyfandaliadau
Os ydych yn cymryd allan arian fesul tipyn neu eich cronfa gyfan ar un tro ac yn ei roi i mewn i gynilion neu ei fuddsoddi, bydd eich cyngor lleol yn ei drin fel ased a’i gynnwys pan fyddant yn gweithio allan beth y gallwch fforddio ei dalu.
Os ydych yn gwario neu roi arian i ffwrdd yn fwriadol (gan gynnwys arian di-dreth) o’ch cronfa bensiwn i gael neu gynyddu cymorth gyda chostau gofal, efallai y bydd eich cyngor lleol yn asesu eich sefyllfa ariannol eto ac yn eich trin fel bod yr arian hwnnw yn parhau i fod gennych.
